पंचवीस लाखाचं बाथरूम !

 आपल्याकडे खूप पैसे असावेत असं प्रत्येकाला वाटतं. अगदी मलाही. पण कशासाठी ? बऱ्याचदा आपलं आयुष्य सुखकारक करण्यासाठी. मलाही खुप पैसा हवा आहे. पण तो सुखासाठी नव्हे. समाजासाठी काहीतरी करता यायला हवं म्हणून. दहा वर्षापूर्वी आठ दहा लाखात मिळणाऱ्या वन बीएचके घराची किंमत आता २५ - ३०लाख झालीय. खरंच परवडतं असं घर घेणं ? इथं आपण २५-३० लाखाचं घर परवडतं कि नाही असा विचार करतो आणि परवा मी एका गृहस्थांच्या घरात अत्यंत देखणं बाथरूम पाहिलं. काय नव्हतं त्यात. अंघोळीसाठी जेजे हवं ते सारं होतंच, स्टिम बाथची सोय होती. गिझर तर होताच होता. पण टिव्ही होता, इंटरनेट होतं. सारं  काही स्वयंचलित. मला फार अप्रूप वाटलं. न राहून त्या गृहस्थांना ' बाथरुमला किती खर्च आला ? ' असं विचारलं. 

' फार नाही पंचवीस लाख.' पाच पंचवीस रुपयांचा भाजीपाला आणावा इतक्या सहजतेनं त्यांनी सांगितलं.

मी सुन्न होऊन तिथून बाहेर पडलो. मनात विचार आला. सालं आपण १५ वर्षापूर्वी चार लाखाचा फ्ल्याट कसाबसा कर्ज काढून घेतला. आज तो छोटा वाटतोय पण ४० लाख रुपयांचा मोठा फ्ल्याट घेणं आज आपल्या आवाक्याबाहेरच आहे. आणि इथं २५ लाखांचं नुसतं बाथरूम !

वाटलं काही नाही आपणही खुप पैसा कमवायचा. असंच बाथरूम बांधायचं. पण हा विचार क्षणभरच टिकला. 

वाटलं काय करायचंय २५ लाखांचं बाथरूम ? बाथरूम २५ लाखांचं असलं काय आणि ५० लाखांचं असलं काय शेवटची आंघोळ कोणीच घरात घालत नाही. 

खरंच माणसाला संपत्तीची एवढी का हाव असते ? कितीही कमावलं तरी कमरेचा करगोटाही सोबत नेता येत नाही हे प्रत्येकाला माहित असतं तरीही माणुस का या मृगजळाच्या मागे लागतो ? बाबा महाराज सातारकरांसारखा प्रवचनकार एका प्रवचनाचे ५० हजार का घेतो ? शरिराला कितीही सुखात ठेवलं अगदी पंचवीस लाखाच्या स्नान गृहात अंघोळ केली तरी त्या शरीरावर मृत्यूची छाया पडल्यावाचून का राहणार आहे.  जगण्यासाठी पैसा हवाच हे मान्य. घरात फ्रिज हवा, टिव्ही हवा, सहकुटुंब प्रवास करायला एखादी चारचाकी हवी हेही ठिकच. पण २५ लाखांचं बाथरूम ?

राजाचं राज्य रहात नाही, सावकाराची सावकारकी टिकत नाही, संस्थांनिकांच संस्थान उरत नाही. उरते ती फक्त ज्ञानेश्वरांची ज्ञानेश्वरी, तुकारामांची गाथा. उरतात ते केवळ समर्थांचे मनाचे श्लोक. हे सारं शाश्वत. पण हे जे शाश्वत ते अनेकांच्या हाती लागत नाही. हे हाती लागत नाही म्हणून कुणालाही दुखं वाटत नाही.

पण अशाश्वत पैसा हाती लागावा म्हणून आपण जिवाचं रान करतो. असं करू नका मित्रांनो. गरजे इतका पैसा नक्कीच येत असतो कारण ज्यानं चोच दिली आहे तो दाणाही देत असतो. 

त्यामुळेच कधी कुणाचं २५ लाखांचं बाथरूम पाहुन कसा का असेना पण पैसा मिळवायचाच असा अट्टहास करू नका. कारण प्रत्येकाची शेवटची अंघोळ घराबाहेरच होत असते हे लक्षात ठेवा.