लोकशाहीची फसवणूक

ज्या बिहारच्या निवडणुकीची सगळेजण आतुरतेने वाट पहात होते, ती बिहारची निवडणूक पार पडली. दुसऱ्याच्या दुखातच आपलं सुख शोधणं हि भारतीय संस्कृतीच आहे याची प्रचीती यावी तसं शिवसेनेच्या संजय राउतांनी आनंदोस्त्व साजरा करत भाजपाला चिमटा काढला. म्हणाले ,
" महाराष्ट्रात आत्ता निवडणुका झाल्या तर महाराष्ट्रातहि बिहारसारखेच चित्र पहायला मिळेल. " व्वा ! काय मित्र आहे.

भाजपाच्या पराभवाचे अनेक अर्थ काढले जातील. कुणी म्हणेल हा मोदींचा पराभव. कोणी म्हणेल हा मोदींच्या धोरणाचा पराभव. कोणी म्हणेल अमित शहांची राजकीय खेळी चुकली.

लालू म्हणतील, " हा बिहारच्या जनतेचा विजय आहे. "         

राहुल गांधी म्हणतील, " हा लोकशाहीचा विजय आहे. "

पण मला वाटतं हा लोकशाहीचा विजय नसुन लोकशाहीची फसवणूक आहे.

स्वतःला  राष्ट्रीय पक्ष म्हणवणाऱ्या कॉंग्रेसने केवळ भाजपाला सत्तेपासून दुर ठेवण्यासाठी दुय्यम नव्हे तर जीतानराम मांझीसारख्या तळागाळातल्या नेत्यासारखी अगदी पडेल भुमिका घ्यावी हा कॉंग्रेसचा पराभव नाही का ? पण भाजपा सत्तेपासून दुर आहे ना.  मग हे खुष.    

खरंतर दिल्लीतल्या घडामोडी पाहून बिहारची जनता काही बोध घेईल असे मला वाटत होते. परंतु आमची लोकशाही अशीच आहे. ती जातपात पहाते, ती धर्म पहाते, ती प्रांत पहाते, मतासाठी दिलेल्या आश्वासनात ती स्वतःचा स्वार्थ शोधते. पण ती देशाच्या सर्वांगीण विकासाचा विचार कधीच करत नाही.        

पहा ना ! केवळ व्यक्तिगत विरोध म्हणुन आणि आपल्याला डोईजड होईल असं कुणीतरी पुढ जातंय हे पाहून नितीश कुमारांनी मोदींना विरोध दाखवत भाजपापासून फारकत घेतली. आणि आपले कट्टर विरोधक असलेल्या लालूंच्या गळ्यात गळा घातला. कशासाठी ? बिहारच्या जनतेच्या कल्याणासाठी ? एकेकाळी नितीशकुमारांवर तोंडसुख घेणारे लालू आज त्यांचे गोडवे गाताहेत. कशासाठी ? बिहारच्या जनतेच्या हितासाठी ? छे ! यांना तर फक्त सत्ता हवी आहे.

कल्याण डोंबिवली एवढी गलिच्छ नगरपालिका मी दुसरी पाहिली नाही. पण तरीही तिथे वर्षानुवर्ष सत्तेत असणारी शिवसेना सर्वाधिक जागा मिळवते. दिल्लीतल्या जनतेला केवळ ' बिजली हाफ , पाणी माफ ' चं गजर दाखवत केजरीवाल एकहाती सत्ता मिळवतात.     

भाजपाच्या पराभवाचे कारण त्यांच्या कर्तृत्वात शोधण्यापेक्षा सगळे वैरभाव विसरून राजकीय शहाणपण दाखवत नितीश लालूच्या अभद्र युतीत युतीत शोधावे लागेल. सत्तेसाठी एकत्र आलेले नितीश लालू आणि भाजपाला सत्तेपासून दुर ठेवण्यासाठी त्यांच्या पायाशी लोळण घेणारी कॉंग्रेस हे खरं भाजपाच्या पराभवाच कारण आहे. त्याच बरोबर आपणच खरे किंगमेकर हे दाखवून देण्यासाठी कधीकाळी केजरीवालचा रथ हाकणारी आणि आता भाजपाचे पाय ओढणारी मिडियासुद्धा भाजपाच्या पराभवाला कारणीभूत आहे. 

या सगळ्यामुळे सत्याचाच विजय होतो या निष्ठेला तडा जातो. अनेक द्रुष्ट शक्ती एकत्र आल्या तर त्या चांगुलपणाचा पराभव करू शकतात हे दिसून आले. उद्या पश्चिम बंगाल आहे, उत्तर पद्रेश आहे असेच चालत राहिले तर अवघड आहे.

आपले भले कशात आहे हे आमच्या लोकशाहीला कधी कळणार ?