Shivsena, BJP, Assembly election : काय आहे भाजपाच्या मनात ?

( खालचं चित्रं नक्की पहा )

किती घडामोडी घडल्या मागच्या महिन्याभरात. युती तुटली. उद्धव ठाकरेंनी ओकता येईल तेवढी गरळ ओकली. प्रचार संपला. एग्झिट पोलनी भाजपा एक नंबरचा तर शिवसेना दोन नंबरचा पक्ष ठरण्याच भाकीत केलं. सगळ्याच पक्षांनी. ते नाकारलं. मतमोजणी पार पडली. १२३ जागासह भाजपा सर्वात मोठा पक्ष ठरला. ६३ जागासह शिवसेना दुसऱ्या क्रमांकावर राहिला. पुढचं सगळं तुम्हाला ठाऊक आहे.  पण काय होणार आहे शेवटी. भाजपा शिवसेना युती होणार कि शिवसेना विरोधात बसणार. नेमकं काय आहे भाजपाच्या मनात ?

माध्यमात एकामागून एक बातम्या झळकताहेत. कधी २८- १४ असं खाते वाटप होणार. तर कधी १८-९ असा खाते वाटप होणार. कशी उद्धव ठाकरे मोदींच्या स्नेह भोजनाला उपस्थित रहाणार तर कधी उद्धव ठाकरे मोदींच्या स्नेह भोजनाला उपस्थित रहाणार नाहीत. एक ना अनेक. पण खरं काय ? आजही हे असं घडेल असं कुणीच सांगू शकत नाही. पण भाजपा शिवसेनेचा पाठींबा घेऊन सरकार स्थापन करेल असा मला विश्वास आहे. मग या वेगवेगळ्या बातम्या येताहेत त्या खऱ्या नाहीत का ? नक्कीच खऱ्या आहेत. मग का वागताहेत भाजपाचे नेते असे ?

जागा वाटपावरून शिवसेनेने अखेरपर्यंत जी भूमिका घेतली ती आज भाजपा आज घेते आहे. यात बदला घेण्याची भावना मुळीच नाही. केवळ भाजपाला जे निर्णय घ्यायचे आहेत त्यात भाजपाला शिवसेनेचा हस्तक्षेप नको आहे. म्हणजे भाजपाला सापत्नभावाची वागणुक दयायची आहे असंही नाही. पण भाजपानं हात पुढे केला तर शिवसेनेच्या अनेक अटी डोकं वर काढतील असं भाजपा नेत्यांना वाटतं आहे. आणि म्हणुनच शिवसेनेला अखेरच्या क्षणापर्यंत चर्चेपासून दुर ठेवण्याचा भाजपाचा मनसुबा आहे.

भाजपाला शिवसेनेपासुन दूर राहून चालणारही नाही. कारण ते केवळ येत्या पाच वर्षाचा विचार करत नाहीत. या नंतर विरोधी पक्षांनी लवकर डोकं वर काढू नये यासाठी भाजपाच्या सर्व खेळ्या अत्यंत नियोजनबद्ध सुरु आहेत. भाजपात मुख्यमंत्रीपदासाठी वाद वगेरे काही नाही. तसं असतं तर हरियाणात मुख्यमंत्री पदाचे चार सहा दावेदार असताना कोणत्याही वादाशिवाय मनोहरलाल खट्टर मुख्यमंत्री झालेच ना. अवघ्या ७ दिवसात त्यांच्या मंत्रीमंडळासकट सगळ्यांचे शपथविधी पार पडले ना. खट्टर यांच्या सारखा कोणताही प्रशासकीय अनुभव नसलेला प्रथमच आमदार झालेला इसम मुख्यमंत्री झाला ना ! त्यांनाच का मुख्यमंत्री केलं. कारण एकच विनापाश माणुस. ज्याला भ्रष्टाचार करण्याची आणि करू देण्याची गरज नाही.

या सगळ्यातनं शिवसेनेने एकच धडा घ्यायचा आहे. महाराष्ट्रातल्या पाच वर्षाच्या सत्तेत आपल्याला भाजपाच्या कोणत्याही निर्णयात फार हस्तक्षेप करून चालणार नाही. राष्ट्रवादीचा पाठींबा घेऊन किंवा अल्प मतातलं सरकार स्थापन करण्यात भाजपाला मुळीच स्वारस्य नाही. आणि नुसता विधानसभेचाच प्रश्न नाही. वर्षा दोन वर्षात येणाऱ्या महानगरपालिकांच्या निवडणुका आहेत. महाराष्ट्राच्या राजकारणात अजुनही मजबुत पाऊल ठेवायचं आहे. शिवसेनेनं भाजपाच्या कलानं घेण्यातच शिवसेनेचं हित आहे. फक्त शिवसेनेला ते समजायला हवं.

भाजपाच्या निम्मी मंत्रिपद शिवसेनेला मिळायला हवीत ही शिवसेनेची अपेक्षा भाजपाच्या पचनी पडत नाही. कारण भाजपाला निर्णायक बहुमतासाठी केवळ २२ जागा कमी पडताहेत. त्यामुळे तेवढ्यापुरतीच मंत्रिपद शिवसेनेने मागवित हि खरी भाजपाची अपेक्षा आहे आणि ती सहाजिकच आहे. कारण केंद्रात स्पष्ट बहुमत असतानाही भाजपानं आपलं मंत्रीमंडळ लहानच ठेवलं आहे. तसंच त्यांना महाराष्ट्रातही करायचं आहे. समजा भाजपाला एकूण ४० मंत्रीपद असावीत असे मनात असेल तर १४५ ला ४० तर १० ला किती ? तर साधारणता ३ मंत्रिपदे. आता इतरांचा पाठींबा गृहीत धरून भाजपाचे संख्याबळ १३२ होत असेल तर भाजपाला बहुमतासाठी १३ आमदार कमी पडताहेत त्यामुळेच तीनस एक यानुसार १३ ला ४ मंत्रिपद शिवसेनेला द्यावीत असे भाजपाच्या मनात असेल. जागा वाटपाचे गणितही मी मांडले होते. हेही गणितही योग्य आहे असे माझे मत आहे. पण हे शिवसेनेला पटले पाहिजे. 

राष्ट्रवादीनं विनाशर्त पाठींबा देऊ केला म्हणुन भाजपा हुरळून गेली नाही. आणि कोणत्याही परिस्थितीत ते राष्ट्रवादीचा पाठींबा घेऊन स्वतःच्या पायावर धोंडा मारून घेणार नाहीत. तेवढी समज त्यांना आहे. नुकताच पण भरतकुमार राउत या माजी खासदारांनी, " शिवसेनेनं आता अधिक अपमान सहन करू नये. सन्मानानं विरोधी पक्षात बसावं." असा सल्ला दिला आहे. या राउतांचा बोलविता धनी कुणी दुसराच असू शकतो. असं बोलुन शिवसेनेच्या मनात द्विधा मनस्थिती निर्माण करायची. बसु शकणारी घडी मोडायची. एवढाच हेतू यामागे असू शकतो. तो उद्धव ठाकरेंच्या लक्षात यायला हवा. 

अशा गोष्टींनी विचलित न होता. शिवसेनेने वाट पहावी. शेवटी सारे काही मंगलच होईल. मी तर त्यापुढे जाऊन असं म्हणेन कि शिवसेनेने एक पाऊल पुढं टाकुन भाजपाला बिनशर्त पाठींबा द्यावा. भाजपा तो नाकारू शकणार नाही. असा बिनशर्त पाठींबा घेताना भाजपानं शिवसेनेच्या पदरात काहीच टाकलं नाही तर नाचक्की भाजपाची होईल. आणि जनतेची सहानभूती शिवसेनेसोबत राहील.

गरज आहे ती शिवसेनेने डोक्यात राख घालून न घेता समंजस भुमिका घेण्याची.