Shiwsena On Facebook : फेसबुकवरची शिवसेना

मी अत्यंत वेगळ्या मनस्थितीत हा लेख लिहितो आहे. हा लेख लिहिताना कुणाच्याही भावना दुखवणं हा माझा हेतू नाही. कुणाविषयी अपशब्द वापरणं हाही हेतु नाही. पण ज्या तरुणाईवर मोदीजींचा दृढ विश्वास आहे तीच तरुणाई फेसबुकसारख्या सार्वजनिक व्यासपीठावर देशाच्या पंतप्रधानांविषयी अत्यंत अवार्च्य भाषेत प्रतिक्रिया देते हे पाहिलं कि प्रश्न पडतो,

' हि पिढी कशी घडवणार देश ?'

बरं हि मंडळी फेसबुक वापरतात म्हणजे अशिक्षित नसावीत. अगदी मोठया घरची नसली तरी मध्यमवर्गीय असावीत. झोपडपट्टीतली नसावीत. म्हणजे झोपडपट्टीतल्या मुलांवर संस्कार नसतात असे मला म्हणावयाचे नाही. ' चिखलात कमळ फुलावं ' त्याप्रमाणे तिथंही अनेक संस्कारक्षम मुलं असतात. मग फेसबुकवर अवार्च्य भाषेत प्रतिक्रिया देणारी हि मंडळी नेमकी कोणत्या मानसिकतेची असतात. खरंच त्यांच्या प्रतिक्रिया त्यांच्या मनातून उमटल्या असतात कि नेत्यांनी त्यांचा पोपट केलेला असतो.

मान्य की तुम्ही शिवसेनेचे समर्थक असाल. पण आपल्या नेत्याचं समर्थन करायला आणि विरोधकांवर चिखलफेक करायला हिच भाषा वापरायला हवी का ? या शिवसेना समर्थकांना भाजपाच्या समर्थकांनी दिलेली उत्तरही मी पहात असतो. आणि शिवसेनेच्या अत्यंत अवार्च्य भाषेतील प्रतिक्रियांना भाजपाच्या समर्थकांनी दिलेली उत्तरं मात्र बऱ्याचदा अत्यंत सौम्य भाषेत असतात. मग शिवसेनेच्या समर्थकांच्या तोंडी हि भाषा येते कुठून ? हे वळण आई वडिलांचं तर मुळीच नसणार ? शिक्षकांनी सुद्धा हे धडे दिले नसतील ? समाजानही हे वळण लावलं नसेल ! मग कुठून येते शिवसैनिकांच्या तोंडी हि भाषा ?

खुप विचार केला तेव्हा लक्षात आलं, ' जसा नेता तसे कार्यकर्ते.' ' बाळासाहेबांच्या आदरापोटी आणि त्यांना श्रद्धांजली म्हनुन मी शिवसेनेवर टिका करणार नाही. '  असं मोदिजी जाहीर करतात. आणि खरंच तो शब्द पाळतात. पण उद्धव ठाकरे मात्र बेलगाम वारुसारखे वाट्टेल ते बराळताहेत. अफजल खानाची सेना काय ? आणि काय काय ? आपल्या वडिलांच्या वयाच्या आणि देशाचे पंतप्रधान असलेल्या व्यक्तीविषयी आदरभाव बाळगावा हे एका पक्षाच्या सर्वोच्च पदावर विराजमान असणाऱ्या उद्धव ठाकरेंसारख्या नेत्याला कळत नाही तिथं त्यांच्या तथाकथित शिवसैनिकांना कुठून कळणार ?

पण मित्रांनो दुसऱ्यावर चिखल फेकुन आपण स्वतःला महान ठरवू शकत नाही. उद्धव ठाकरे किती टोकाची भाषा वापरताहेत हे जनता पहाते आहे. कार्यकर्त्यांनी त्यांच्या भाषणाचा कितीही उदो उदो केला तरी सर्वसामान्यांना ते हि भाषा, त्यांचं हे वागणं मुळीच पटण्यासारख नाही. त्याची फळं उद्धव ठाकरेंना मिळतीलच.

राज ठाकरेही तसेच. ते तर स्वतःला हुकूमशहाच समजतात. या देशात माझ्यासारखा दुजा कोणी नाही हि भावना त्यांच्या प्रत्येक शब्दातून व्यक्त होते. ते पत्रकारांना फटकारणार ? ते अधिकाऱ्यांना फटकारणार ? ते मोदींना फटकारणार ? का ?

शरद पवार आहेतच. अजित पवारही आहेतच. पण भरीसभर म्हणून कि काय सुप्रिया सुळेसुद्धा मोदींच्या विरुद्ध दंड थोपटणार. ' शरद पवार आणि अजित दादांविषयी बदनामीकारक एक शब्द जरी बोललात तरी गाठ राष्ट्रवादीशी आहे.' असं ठणकावणार. कशासाठी हि दादागिरी ? पण तेच आपले वडील आणि भाऊ मोदींच्या विरुद्ध बोलले तर त्यांचं समर्थन करणार ? वा रे आमचे नेते. आणि धन्य त्यांचे चेले.

जे फेसबुकवर तेच वाट्स अपवर ? तेच इतर ठिकाणी. लोकसभेला मोदींनी मिडीयाचा अत्यंत प्रभावी वापर केला. आज प्रत्येक पक्ष आणि त्यांचा कार्यकर्ता आपली मतं मांडताना सोशल मिडीयाचा वापर करतोय. पण यातुन आपले संस्कार उघडे पडु नये, आपल्या देशाची बदनामी होऊ नये म्हणून नेत्यांनी नाही पण कार्यकर्त्यांनी नक्कीच काळजी घ्यायला हवी.

आपल्या पुढे शिवजींच नाव लावणाऱ्या आणि शिवसैनिक म्हणून स्वतःला मिरवणाऱ्या शिवसैनिकांनी एवढी काळजी घ्यावी हीच प्रामाणिक इच्छा.